Хъша Къуръандал

Къуран 21:10 (мана): ?Дугъриданни Чна квез (авудна) ракъурнава
Ктаб (Къуръан) - виче куьн рикIел гъун*
(квез гьайбатвал гьуьрметар) авай, - бес,
куьне кьатIузвачни?!?.

…Регьимлуда ракъурнавай Ктаб на,
Кваз такьуна, гьевесриз яб гумир, дуст.
Пайгъмбардин ; рекьиз гана таб вуна,
Вилер мичIна акатайнихъ къвемир, дуст.

Аллагьди ваз ганва акьул гекъигдай,
Вав гвайди на Къуръандив гекъиг, дуст.
Вилер ганва физвай рекьиз килигдай,
На кьунвайди нин рехъ ятIа килиг, дуст.

Къутармишвал гьатдач маса рекьерай,
Пайгъамбардин ; геле камар тахьанмаз,
Дуьз рекьяй вач, экъечI вун а мичIерай,
А мичIери кьилел цIаяр тагъанмаз.

Дагъдин кьвалан вун къередал атанва,
Фагьум тийиз вун мад вилик фимир, дуст.
Вун рагалай физвайди на кьатIанва,
Акьулдиз яб це, на жув пуч мийир, дуст.

Чирвилеркай кьуртIа вуна куьмек ваз -
Шаклувилер илитI жедач ви чандал.
Цукай хуьдай гьатдач маса дестек ваз -
Хъша, дуст кас, суннадални Къуръандал…