Бес им вуч я?

Мурдар, алчах къилихдин,
мезни авай иблисдин,
азарни квай гьилледин,
йигинвални гуьлледин,
мефт1ер югъвай келледин,
зегьле тухуз магьледин,
пис ни галай фитедин,
ц1ай кутадай фитнедин,
дугъри кас ийиз угъри,
буьгьтен вегьез, нез гугъри,
чарад к1вале тач игри,
неч лугьуз вичи дуьгуь,
аш акурла жед гъуьргъуь,
папаз хьиз вичин гъуьлуь,
зайифдаз гуз т1уш кьуьлуь,
лап пепеди хьиз куьлуь,
къуллугъдизни къуватдиз
икрамда юкь галтадиз,
са югъни жеч галачир
мич1и йиф варз авачир,
савда жеч ам алачир,
гьарам адак кувачир,
авач чка ам тефир,
лап вичелай жеч кфир,
дуьздал вичик квай тахсир,
акъудайла жеда п1ир,
ийида хьи гардан к1ир,
вичиз акьван масан тир,
хийир садаз гудайд туш,
вич жегьнемд ц1а кудайд туш,
кард я лугьуз, са байкъуш,
халкьд к1вачера жез аруш,
на лугьуди я чавуш,
сив - пад кумачир я калуш,
ам акур кас жед нахуш,
гайиди хьиз лап байгьуш,
вилерал акьалтда хуш,
гуя гам ршазвай я каруш,
дишегьли туш вич, я руш,
итим туш, я гада туш,
туш гьайван, ничхир, я къуш -
бес им вуч я, я вуч туш?!..