Пехилдаз

Чарадалай ийиз гьайиф,
Хуш къведа ваз са ви тариф.
Жува жув яз кьадай ариф,
Ихьтин аламат жедани?

Хабар кьуна за адавай,
Са касдикай лап ад авай.
Гаф жагъанач са дад авай,
Ихьтин керемат жедани?

Ни тIвар кьуртIан чпин хуьре,
Синихарда агъзур жуьре.
Вичин тариф хуш тир кере,
Ихьтин мусибат жедани?

Вичин тариф кьурла хабар,
Ламра хьиз тик кьада япар.
Башламишда ийиз барбар,
Ихьтин кьве бубат жедани?

Кимидани, вич кими яз
Кьадач хиве, яд жими яз.
Кваз такьадай рагъ чими яз,
Ихьтин кас абад жедани?

Квез герек я артух гафар?
Кьелни квачир таквад афар.
ЧIимел хьайи чIавуз гатфар,
Ихьтин берекат жедани?

Эй Сажидин, хьухь вун уях,
ЛаматIрикай хьухь са къерех.
Алчахдикай кьуна даях,
Ихьтин мярекат жедани?